(Видео) Австриски јутјубери објавија снимка од воен аеродром кај Белград: Се качувале на воени авиони

Видео објавено на каналот „Roofless TV“ предизвика внимание откако двајца австриски јутјубери тврдат дека неовластено влегле во воениот аеродром „Полковник-пилот Миленко Павловиќ“ во Батајница, во близина на Белград.

Снимката за неколку дена собра повеќе од половина милион прегледи. На неа се гледа како двајцата млади луѓе прво ги снимаат воените авиони од надворешната страна на објектот, а потоа се движат и во внатрешноста на воениот комплекс.

— реклама —

Во делови од снимката тие се приближуваат до летала за кои наведуваат дека повеќе не се користат, се качуваат на нив, влегуваат во некои од нив и ги снимаат. Во еден момент е забележано и слетување на авион.

Според објавениот материјал, двајцата за време на престојот во заштитениот простор не сретнале ниту еден вработен. Не е познато на кој начин успеале да влезат во комплексот.

— реклама —

Авторите на каналот „Roofless TV“ се двајца млади луѓе од Виена кои се претставуваат како истражувачи на скриени локации. Каналот објавува содржини од т.н. „urbex“ истражувања на напуштени и забранети подрачја, како и снимки од паркур.

— реклама —

Во видеото има и делови за кои авторите наведуваат дека се снимени во Казахстан, по што дејствието продолжува во Србија.

Министерството за одбрана на Србија и полицијата засега не го коментирале случајот.

— реклама —

Воениот аеродром во Батајница се наоѓа на околу 20 километри од Белград. Изграден е во периодот од 1947 до 1951 година, а денес таму е сместена 204. воздухопловна бригада на Военото воздухопловство и противвоздушната одбрана на Војската на Србија.