На прес-конференција, портпаролката на партијата Маја Борозан побара кривична одговорност за надлежните институции и функционери поради случајот со загадената вода во Гостивар, оценувајќи дека признанието на министерот за здравство Сашо Клековски за задоцнета реакција е потврда за институционален пропуст.
Борозан посочи дека повеќе од 4.070 граѓани досега побарале медицинска помош поради, како што наведе, затруена вода со фекалии. Според СДСМ, само вчера биле регистрирани уште 125 прегледи на лица со симптоми, а едно дете било хоспитализирано.
Од партијата тврдат дека првите симптоми кај граѓаните се појавиле уште на 14 јули, додека епидемија била прогласена дури на 19 јули, обвинувајќи дека институциите пет дена не ја информирале јавноста и не презеле навремени мерки.
СДСМ оценува дека признанието на министерот Клековски за задоцнетото активирање на „црвените светла“ претставува потврда за системски пропуст и бара кривична одговорност.
Партијата побара Јавното обвинителство да отвори постапка и да утврди одговорност, а како одговорни ги посочи министерот за здравство Сашо Клековски, директорката на Државниот санитарен и здравствен инспекторат Марија Андоновска, како и директорите на локалните центри за јавно здравје.
Од СДСМ порачаа дека, според нив, за случајот со водата во Гостивар мора да има одговорност.
