На прес-конференција, Маја Борозан од Форумот на жени на СДСМ денеска ја обвини Владата дека со неодговорен пристап го загрозува здравјето на граѓаните, посочувајќи дека водата во Гостивар сè уште не е безбедна ниту за пиење ниту за капење.
Борозан истакна дека во повеќе од 50 населени места во државата водата не е исправна за пиење, оценувајќи дека институциите целосно потфрлиле во справувањето со проблемот.
Според неа, официјалните информации потврдуваат дека во Гостивар продолжува процесот на хиперхлорирање, а во дел од примероците и натаму се пронаоѓаат бактерии.
Од СДСМ предупредија дека хиперхлорираната вода не е наменета за постојана употреба и дека, додека концентрацијата на хлор е висока, не треба да се користи ниту за капење, бидејќи може да предизвика иритација на кожата, очите и дишните патишта, особено при туширање со топла вода.
Партијата оцени дека изјавите на надлежните институции биле меѓусебно контрадикторни. Потсетија дека премиерот Христијан Мицкоски најавил дека водата ќе биде технички исправна, министерот за здравство Сашо Клековски најавил дека до крајот на минатата недела ќе биде безбедна за пиење, додека подоцна самиот Мицкоски изјавил дека се појавила нова бактерија.
Според СДСМ, ваквите различни пораки создаваат забуна кај граѓаните и можат да имаат сериозни последици по јавното здравје.
Од партијата побараа Владата да го објави официјалниот документ со кој е потврдено дека водата е технички исправна и безбедна за капење, наведувајќи дека доколку таков документ бил потпишан, а се утврди дека водата не била безбедна, одговорните лица треба да сносат кривична одговорност.
„Не може да се прават политички кампањи на сметка на здравјето на граѓаните. За ова мора да има одговорност“, порачаа од СДСМ.
