(Видео) Давчевски: Кризата во Скопје ескалира - Орце закасни со прскањето против комарци и одговорност мора да има

Зголемениот број случаи на западнонилска треска во Скопје е причина за сериозна загриженост, оцени денеска на прес-конференцијата претседателот на Градската организација на СДСМ, Александар Давчевски, обвинувајќи го градоначалникот Орце Ѓорѓиевски за задоцнета реакција во справувањето со комарците.

Давчевски посочи дека досега се регистрирани 35 потврдени случаи, четири смртни случаи, а шест лица се на интензивна нега во критична состојба.

— реклама —

Според него, наместо навремена превенција, анализа и системска контрола на жариштата, прскањето против комарци започнало предоцна.

„Орце Ѓорѓиевски затаи кога најмногу требаше да делува. Го немаше кога требаше навремено да се прска, пред вирусот да се прошири и пред граѓаните да почнат да заболуваат“, рече Давчевски.

— реклама —

Тој упати критики и за работата на градската власт, наведувајќи дека, според него, не се решени ниту проблемите со отпадот, јавниот превоз и состојбата во Градскиот парк, додека градоначалникот се занимавал со други активности.

— реклама —

„Кој ја плаќа цената? Цената ја плаќаат Скопјани со сопственото здравје и животи“, истакна Давчевски.

Од СДСМ велат дека задоцнетото реагирање е пример за, како што оценија, поширок начин на функционирање на власта, при кој проблемите прво се оставаат да прераснат во кризи, а потоа се преземаат мерки.

„Орце Ѓорѓиевски не ги заштити Скопјани од комарците. А требаше и мораше. За тоа треба и мора да се одговара“, порача Давчевски.