Девет лица се наоѓаат во критична состојба по судирот на два патнички воза што се случи синоќа во близина на Бедфорд, на околу 90 километри северно од Лондон. Во несреќата загина еден машиновозач, а десетици патници се повредени.
Британската транспортна полиција соопшти дека 28 лица и натаму се хоспитализирани, од кои девет се во критична состојба.
Според службата за итна медицинска помош на Источна Англија, 11 лица се здобиле со многу тешки повреди, 32 со потешки повреди, додека уште 57 лица поминале со полесни повреди. Повеќе од 100 луѓе побарале лекарска помош по несреќата.
На местото на трагедијата се спроведува истрага со цел да се утврдат причините за судирот.
„Нашите специјализирани истражители соработуваат со Одделот за истрага на железнички несреќи за да ги утврдат сите околности и причините што довеле до овој инцидент“, изјави претставничката на полицијата, Луси Д’Орси.
Во несреќата учествувале два воза на железничката компанија „Ист Мидлендс Рејлвеј“, кои се движеле кон Лондон по истиот колосек. Полицијата потврди дека машиновозачот на еден од возовите починал на местото на несреќата.
Британската министерка за транспорт Хајди Александер изјави дека е прерано да се шпекулира за причините за несреќата и најави темелна истрага.
Засега не е познато дали евентуални проблеми со сигнализацијата придонеле за судирот.
Во спасувачката акција биле ангажирани повеќе од 20 возила на итната помош, специјализирани спасувачки тимови и шест медицински хеликоптери.
По трагедијата се огласи и британскиот крал Чарлс Трети, кој изрази сочувство до семејството на загинатиот машиновозач и до сите повредени.
Директорот на железничката компанија Вил Роџерс изјави дека ова е „исклучително тажен ден за целата железничка заедница“ и најави целосна соработка со истражните органи.
