(Видео) Дончиќ со 53 поени ги предводеше Лејкерс до пресврт и победа над Портланд

Лука Дончиќ имаше извонредна вечер во НБА-лигата, постигнувајќи 53 поени, пет скока и пет асистенции во победата на Лос Анџелес лејкерс над Портланд со 124-118.

Иако гостите во првото полувреме имаа предност од 16 поени, Лејкерс успеаја да направат целосен пресврт. Портланд ја доби првата четвртина со 29-20, а на паузата замина со водство од 60-53.

— реклама —

Дончиќ го заврши првото полувреме со спектакуларна тројка од сопствената половина, оддалечена околу 19 метри од кошот. Во третата четвртина постигна уште 20 поени, а Лејкерс го добија периодот со убедливи 34-15 и поведоа со 87-75.

Портланд се обиде да се врати во завршницата, намалувајќи ја негативата на шест поени со серија од 10-0. Сепак, Остин Ривс со својата прва погодена тројка на натпреварот повторно им донесе двоцифрена предност на домаќините. Ривс го потврди триумфот и со погодено слободно фрлање на три секунди пред крајот.

— реклама —

Со овој настап Дончиќ на четири последователни натпревари постигна најмалку 40 поени. Последен пат таква серија во дресот на Лејкерс имаше Коби Брајант во јануари 2012 година.

— реклама —

За словенечкиот кошаркар ова беше и четврти натпревар со најмалку 50 поени во дресот на Лејкерс, со што го надмина Леброн Џејмс и се израмни со Џорџ Мајкан на четвртото место на вечната клупска листа.

По девет одиграни натпревари, Дончиќ има 361 постигнат поен, односно просек од 40,1 поен по натпревар. Единствен кошаркар кој имал толку висок просек по првите девет натпревари во една сезона е легендарниот Вилт Чемберлен.

— реклама —

Со победата Лејкерс му се реваншираа на Портланд за поразот од 136-129 на 27 октомври, кога Дончиќ постигна 41 поен.