Во јавноста во САД се појавија остри критики на сметка на словенечкиот кошаркар Лука Дончиќ, откако тој повторно го пропушти натпреварот на Лос Анџелес Лејкерс во плејофот против Оклахома Сити Тандер.
Лејкерс беа поразени со 108:90 во првиот натпревар од полуфиналето на Западната конференција, а отсуството на Дончиќ поради повреда на задната ложа дополнително ја засили фрустрацијата кај навивачите и дел од спортските коментатори. Тој се соочува со повредата уште од почетокот на април и сè уште не се враќа на терен.
Најгласни во критиките беа дел од јавните личности во САД, кои го доведуваат во прашање неговиот настап и достапност во клучниот дел од сезоната, и покрај неговиот висок договор и улога во тимот. Дел од коментарите на социјалните мрежи предизвикаа и дополнителни реакции поради нивниот остар тон.
Според последните информации од спортските новинари, неговото враќање на теренот останува неизвесно и можно е да пропушти и наредни натпревари од серијата, што претставува сериозен удар за амбициите на Лејкерс во плејофот.
