(Видео) Драма во банка во Калифорнија: Напаѓач држи заложници, преговорите траат со часови

Вистинска драма се одвива во градот Бејкерсфилд во американската сојузна држава Калифорнија, каде што маж се забарикадирал во филијала на банка и држи заложници, соопшти локалната полиција.

Инцидентот започнал во вторникот околу 13 часот по локално време, кога полицијата добила пријава за закана со бомба во филијала на банката „Чејс“ во центарот на градот.

— реклама —

Според првичните информации, засега неидентификуван маж влегол во банката и останал внатре со непознат број лица. По неколкучасовни преговори, полицијата успеала да обезбеди ослободување на двајца заложници.

— реклама —

Властите соопштија дека досега нема информации за повредени лица, додека кризата сè уште трае.

Преговарачите одржуваат телефонски контакт со осомничениот, а надлежните сè уште не потврдиле дали во објектот навистина има експлозивна направа.

— реклама —

Во акцијата се вклучени и Федералното истражно биро (ФБИ), Министерството за внатрешна безбедност на САД, како и дополнителни полициски сили од други делови на државата.

Поради безбедносни причини, евакуирани се повеќе објекти во околината на банката, која се наоѓа на аголот на Честер авенија и 17. улица.

Полицијата ги повика граѓаните да го избегнуваат тоа подрачје, каде што се распоредени припадници на SWAT единици, тимови за деминирање, полициски кучиња, дронови и други специјализирани служби.