(Видео) Драматични сцени по земјотресот во Панама: Зградите се нишаат, оштетени цркви и хотели, луѓето панично бегаат

Силниот земјотрес што во петокот ја погоди Панама предизвика голема материјална штета, а на социјалните мрежи се шират драматични снимки од оштетени и урнати згради.

Особено загрижувачки се сцените од градот Пенономе, оддалечен повеќе од сто километри од епицентарот, каде што се оштетени цркви, хотели и други објекти. Земјотресот се почувствувал и во соседните држави.

— реклама —

Според првичните податоци на Институтот за геонауки при Универзитетот во Панама, земјотресот имал магнитуда од 7 степени, а жариштето се наоѓало на длабочина од десет километри, на околу 39 километри западно од Тоноси. Сепак, дополнителните анализи на меѓународните сеизмолошки институции укажувале на посилно тресење на тлото.

Американскиот геолошки завод (USGS) во еден од прелиминарните извештаи ја проценил магнитудата на 7,7 степени и предупредил на можност од човечки жртви и голема материјална штета.

— реклама —

За силината на земјотресот сведочат бројните снимки што набргу се појавија на интернет. Жителите опишуваат како зградите силно се нишале, предметите паѓале од мебелот, а многумина во страв истрчувале од своите домови.

Според информациите објавени од CNN, потврдена е автентичноста на снимките од Пенономе на кои се гледаат тешко оштетени објекти. Меѓу нив е и црква чија камбанарија делумно се урнала, додека на друга зграда е оштетен дел од надворешната фасада.

— реклама —

Голема штета е забележана и во познатото туристичко место Плаја Венао, оддалечено околу 60 километри од епицентарот. Според достапните извештаи, таму се урнал хотелот „Ел Ситио“, а на снимките се гледа и урната повеќекатница под чии урнатини се затрупани неколку автомобили.

Силното тресење го зафатило и подрачјето на Панамскиот Канал. Особено внимание привлекле снимките од Мостот на стогодишнината (Centennial Bridge), на кои се гледа изразеното нишање на носечките кабли додека автомобилите минуваат преку мостот.

И покрај земјотресот, Управата на Панамскиот Канал соопштила дека сообраќајот се одвива непрекинато, а истовремено се спроведуваат безбедносни проверки за да се утврди дали има оштетувања на инфраструктурата.

Земјотресот предизвикал и нарушувања во работата на јавните служби. Во главниот град привремено бил запрен сообраќајот на две линии од метрото, а некои станици морале да бидат евакуирани.

Министерството за образование ја прекинало наставата на целата територија на државата до крајот на денот, додека, според локалните медиуми, меѓународниот аеродром бил привремено затворен од безбедносни причини.