(Видео) Погледнете како водата се излеваше од базенот за време на земјотресот во Панама – објавени нови снимки

Силен земјотрес со магнитуда од 7,7 степени ја погоди Панама, а снимките од настанот покажуваат колку силно се тресела земјата. На едно од видеата се гледа како водата во базен силно се разбранува и се прелева преку рабовите додека трае земјотресот.

Американскиот геолошки завод (USGS) ја потврди магнитудата од 7,7 степени, откако првичната процена беше дополнително коригирана. Епицентарот бил на околу 12 километри западно-југозападно од местото Питалоса Ариба, во централниот дел на Панама, на длабочина од 12,6 километри.

— реклама —

Земјотресот се случил во 12:56 часот по локално време, а силно бил почувствуван и во главниот град Панама Сити, кој се наоѓа на повеќе од 200 километри од епицентарот.

По првиот удар биле регистрирани десетици последователни земјотреси. Меѓу нив имало и силен потрес со магнитуда од 6,6 степени, како и серија земјотреси со магнитуда меѓу 4,5 и 5,8 степени.

Во првите часови по земјотресот немало информации за загинати или поголеми разурнувања. Подоцна, панамските власти соопштиле дека има повредени и материјална штета во повеќе провинции.

— реклама —

Оштетени биле куќи, училишта, цркви, јавни објекти, патишта и мостови, особено во провинциите Ерера, Лос Сантос, Верагуас и Кокле.

По земјотресот накратко било издадено предупредување за можни опасни бранови долж делови од пацифичкиот брег на Панама и соседните држави. Предупредувањето подоцна било укинато.

— реклама —

Панамскиот канал продолжил да функционира нормално по извршените проверки на инфраструктурата.

Аеродромот привремено го прекинал сообраќајот

Меѓународниот аеродром Токумен во Панама Сити привремено го прекинал авиосообраќајот поради безбедносни проверки.

Подоцна било соопштено дека на инфраструктурата не е утврдена штета и дека летовите и комерцијалните активности продолжиле. На патниците им било препорачано да го проверат статусот на летот кај авиокомпанијата пред да тргнат кон аеродромот.

Колумбиските воздухопловни власти, за време на прекинот, активирале регионален план и подготвиле седум аеродроми за прифаќање пренасочени летови.

Американскиот државен секретар Марко Рубио изјавил дека Вашингтон ја следи ситуацијата и дека, на барање на панамската влада, започнал со мобилизирање персонал и ресурси за помош.

Земјотресот со магнитуда од 7,7 степени бил опишан како најсилен регистриран во Панама во последните неколку децении. Во текот на ноќта, жителите на погодените подрачја продолжиле да ги чувствуваат последователните потреси.