Дрон рано утринава погоди бензинска станица во Киев, при што е повредено едно лице, соопшти градоначалникот на украинската престолнина, Виталиј Кличко. Нападот се случи само еден ден откако американскиот претседател Доналд Трамп изјави дека Украина и Русија се договориле меѓусебно да не ја напаѓаат енергетската инфраструктура.
Според Кличко, во нападот биле погодени и магацини во друг дел од градот. Експлозијата ја слушнал и сведок на „Ројтерс“ во Киев.
Русија во последно време ги проширува целите на нападите врз Киев и сè почесто се напаѓаат бензински станици. Според украинските власти, во последните неколку месеци биле погодени околу 300 бензински станици, главно во подрачја во близина на фронтот.
Во меѓувреме, Полска накратко го активирала военото воздухопловство како превентивна мерка поради рускиот напад врз Украина. Полските вооружени сили подоцна соопштија дека немало нарушување на полскиот воздушен простор.
Загриженоста во соседните земји дополнително расте поради воените дронови што залутуваат надвор од украинскиот и рускиот воздушен простор. Во Литванија, борбен авион на НАТО рано утринава соборил дрон, соопшти Националниот центар за управување со кризи, откако претходно било издадено предупредување за дрон во Вилнус и околината.
Украина во меѓувреме продолжува со напади врз цели на руска територија. Во ракетен напад бил оштетен магацин на интернет-продавницата „Озон“ во пристанишниот град Таганрог, според регионалните власти.
Во одделен напад со дрон било погодено индустриско построение во Самарската област, каде што се наоѓаат неколку големи рафинерии за нафта. Овие наводи не се независно потврдени.
Украинскиот претседател Володимир Зеленски изјави дека Киев е подготвен да го поддржи американскиот предлог за запирање на нападите врз енергетските објекти, но само доколку Вашингтон може да гарантира дека Москва навистина е подготвена да стави крај на војната.
