Две лица се полесно повредени откако автомобил вчера влетал во колона граѓани за време на мирен протест за поддршка на студентите во српскиот град Бачка Паланка, објави телевизијата „Н1“.
Според очевидци, возачот на автомобил „Хјундаи“ не застанал и со возилото се упатил кон учесниците на протестот. На местото на настанот интервенирала Итната медицинска помош, а повредените добиле лекарска помош.
По инцидентот, демонстрантите го опколиле автомобилот, по што интервенирала сообраќајната полиција и го отстранила возачот од местото на настанот.
Драган Прпа, член на Собирот на граѓани на Бачка Паланка, за „Н1“ изјавил дека редарите се обиделе да го сопрат возачот, но тој продолжил да се движи кон толпата, поради што луѓето морале да се фрлат на земја за да избегнат удар.
Тој тврди дека, откако влетал меѓу демонстрантите, возачот се движел наназад и удрил во неколку учесници на протестот.
Полицијата извршила увид на местото и земала изјави од сведоците и од повредените, а околностите под кои се случил инцидентот се утврдуваат.
Собирот на граѓани на Бачка Паланка редовно организира мирни прошетки како поддршка на студентските протести во Србија, кои започнаа по трагедијата со падот на настрешницата на железничката станица во Нови Сад во ноември 2024 година.
