Продолжува јавната преписка меѓу Јон Фрчковски и пратеникот од ВМРО-ДПМНЕ, Миле Лефков. Откако Лефков го повика Фрчковски да ги пријави лицата од кои набавувал дрога, Фрчковски објави ново видео во кое возврати со серија обвинувања кон пратеникот и ВМРО-ДПМНЕ, а најави и дека сам ќе направи тест за наркотици и јавно ќе ги покаже резултатите.
Фрчковски претходно го повикуваше Лефков заедно да се тестираат за наркотици. Сега вели дека повеќе нема да го чека и дека самиот ќе оди на тестирање.
„А бидејќи ветив дека ќе одам со тебе, еве, ветувам дека ќе одам сам. За да не биде дека само зборував, знаејќи дека ти не смееш, бидејќи на тестот се гледа сè. Ти се јавувам наскоро, Миле, со резултатите“, рече Фрчковски.
Во видеото тој зборува и за сопственото минато, велејќи: „Јас бев млад, згрешив“, во контекст на претходната јавна преписка за користење наркотици.
Истовремено, Фрчковски изнесе низа тешки обвинувања кон Лефков, лидерот на ВМРО-ДПМНЕ Христијан Мицкоски и луѓе кои ги поврзува со партијата.
„Единствените дилери во земјата сте вие, твојот шеф Мицкоски, ти и вашата екипа. Вие пренесувавте пет тони дрога преку граница“, рече Фрчковски.
Тој во продолжение спомена и лице по име Симе, за кое тврди дека било поврзано со Мицкоски и дека имало фотографии со него.
„Симе, оној што пукаше, е со твојот шеф, се сеќаваш? Цел албум имаше со Мицкоски. Тоа е вашиот дилер, сите се ваши“, рече Фрчковски.
Фрчковски не застана тука, туку изнесе и лични обвинувања кон Лефков за наводно користење алкохол и дрога.
„Сега на сите им е јасно дека не само што имаш проблем со алкохолот, туку веројатно покажуваш дека имаш проблем и со дрогата. Ај, што имаш ти? Туку веројатно има и половина од вашата банда“, рече Фрчковски.
Новата реакција доаѓа откако Лефков претходно одби да се фокусира на повикот за заедничко тестирање и му постави контрапредизвик на Фрчковски – доколку признава дека користел дрога, да каже од кого ја набавувал и тие лица да ги пријави во полиција и во Обвинителството.
Со новото видео, Фрчковски сега најавува конкретен следен чекор – дека ќе се тестира без Лефков и потоа ќе ги соопшти резултатите.
