Антикорупцискиот тим на СДСМ (АКТ) денеска излезе на прес-конференција со нови обвинувања за, како што тврди, „структурирана бизнис-шема“ поврзана со јавни набавки и реализацијата на проекти финансирани со средства од унгарскиот кредит.
На прес-конференција, членот на Извршниот одбор на СДСМ, Јон Фрчкоски, рече дека по претходно објавените тендерски скандали во вредност од над 100 милиони евра, сега се открива уште еден аспект од, како што наведе, целата шема.
Според Фрчкоски, три компании – „Ленди Груп“, „Пирамид билдинг солушнс“ и „Масев“ – добивале милионски тендери во бројни институции и општини, додека надзорот и проектирањето, како што тврди, најчесто ги вршеле само две фирми – „МГ Проект“ и „МБМ Архитекти“.
Тој посочи дека во Општина Кисела Вода и Општина Илинден, каде изведувач била „Ленди Груп“, надзорот го вршела „МГ Проект“, додека во Општините Аеродром и Гази Баба, каде работела „Пирамид билдинг солушнс“, надзорните договори ги добивала „МБМ Архитекти“.
Фрчкоски тврдеше дека сличен образец постои и кај компанијата „Мастеф“, која, според него, работела под надзор на истите две фирми во повеќе општини и институции.
Од АКТ наведоа дека „МГ Проект“ во изминатите две години склучила договори во вредност од 2,4 милиони евра, додека „МБМ Архитекти“ реализирала договори во вредност од 2,9 милиони евра. Според нивните пресметки, тоа претставува раст од 288,65 проценти од 2024 година наваму.
„Ништо не е случајно. Сè е бизнис-шема за Мицкоски и ВМРО-ОКГ“, изјави Фрчкоски, повикувајќи го Обвинителството да ги испита сите наводи и да утврди евентуална одговорност.
Од СДСМ најавија дека ќе бараат испитување на сите постапки и одговорност, „од прв до последен“.
