Јон Фрчкоски изјави дека СДСМ привремено ги исклучил коментарите на социјалните мрежи поради, како што тврди, организирани напади од бот-профили и тролови поврзани со ВМРО-ДПМНЕ.
Фрчкоски наведе дека, според него, се создаваат голем број лажни профили кои се меѓусебно поврзани и координирано шират навреди, лаги и говор на омраза.
„Работат во смени, како фабрика. Еден ден масовно напаѓаат еден профил, следниот ден друг“, рече Фрчкоски.
Тој тврди дека цел на нападите се сите кои зборуваат за реформи, корупција, криминал и тендерски шеми, како и критичарите на премиерот Христијан Мицкоски и власта.
Фрчкоски наведува дека и самиот повеќепати бил мета на навреди, закани и повици за физичко насилство.
„Целта е да се создаде впечаток дека сите се против нас. Затоа привремено ги исклучивме коментарите“, изјави тој.
Фрчкоски ги повикува граѓаните да пријавуваат сомнителни профили со мал број следбеници и фотографии преземени од интернет.
Според него, коментарите повторно ќе бидат вратени кога, како што наведува, ќе се создадат услови за нормална комуникација без токсична атмосфера и лични навреди.
