Два камиона денеска, нешто пред 11 часот, се судрија кај Стара Пазова на автопатот Белград – Нови Сад, во правец кон Белград, јавуваат српските медиуми.
Според првичните информации, по судирот, пожарникарите го извлекле возачот од едниот камион, но тој веќе бил починат.
Едното товарно возило превезувало плински боци, а по несреќата дошло до истекување на гас. Засега не е познато за каков вид гас станува збор.
Поради безбедносни причини, сообраќајот на овој дел од автопатот е целосно прекинат во двата правци, а на наплатната рампа кај Стара Пазова и на околните делници се формираа долги колони возила.
На терен интервенираат пожарникари и полициски екипи, додека од Патишта на Србија соопштија дека сообраќајот е пренасочен кон клучката кај Стара Пазова и најавија дека јавноста дополнително ќе биде информирана кога состојбата ќе се нормализира.
