Дрон сними голема бела ајкула долга околу три метри како плива на само неколку метри од капачи на плажата Капистрано во Калифорнија, додека тие воопшто не биле свесни за нејзиното присуство.
Снимката ја направил фотографот Мет Ларманд, кој редовно снима ајкули, а според неговите зборови, никогаш досега не видел голема бела ајкула да им се приближи толку многу на луѓе без тие да ја забележат. Тој се обидел да ги предупреди капачите од блискиот мол, но тие не го слушнале. По кратко време, ајкулата мирно се оддалечила и не се случил никаков инцидент.
Експертите велат дека ваквите средби се вообичаени во јужна Калифорнија, особено во летниот период. Според Крис Лоу, директор на лабораторијата за истражување на ајкули при Државниот универзитет во Калифорнија во Лонг Бич, крајбрежјето служи како природно живеалиште за младите големи бели ајкули, каде што тие учат да ловат и често се движат во близина на луѓето.
Тој нагласува дека ајкулите најчесто не покажуваат интерес за луѓето и не ги сметаат за плен.
„Во најголем дел од случаите, тие едноставно ги игнорираат капачите. Пливаат веднаш покрај нив, а луѓето воопшто не знаат дека се таму. Постојат бројни докази дека не претставуваат реална закана, туку само се движат низ своето природно живеалиште“, изјавил Лоу.
Тој додава дека ваквото однесување не треба да се толкува како демнење или лов, туку како обична љубопитност. И покрај честите блиски средби, нападите од големи бели ајкули се исклучително ретки и најчесто ваквите ситуации завршуваат без последици.
