Километарски колони и долги редици возила се создадоа на граничниот премин Табановце, откако почна примената на новиот механизам за проверка и санкционирање на странските возачи кои претходно направиле сообраќаен прекршок регистриран од системот „Сејф сити“.
Фотографиите од терен покажуваат долги колони од автомобили и товарни возила на излез од Македонија, а дел од патниците излегле од возилата додека чекаат да продолжат кон границата.
Како што претходно објави „Скопје1“, странските возила и досега биле регистрирани од камерите на „Сејф сити“ кога поминувале на црвено светло или ја пречекорувале дозволената брзина, но немало воспоставен механизам преку кој прекршителите ќе бидат санкционирани пред да ја напуштат државата.
Сега, според информациите до кои дојдовме, на Табановце се користат и старите гранични терминали. Возилата се проверуваат според регистарските таблички, а доколку системот покаже евидентиран прекршок, возачот се запира и се упатува на дополнителна постапка. Оние за кои нема регистриран прекршок продолжуваат кон излезот од државата.
Во текот на денот, според информациите на „Скопје1“, на овој начин биле откриени околу стотина странски возачи со претходно регистрирани прекршоци.
Новиот начин на постапување, сепак, донесе и дополнително оптоварување на сообраќајот на Табановце, каде што вечерва се забележуваат долги редици од возила.
Министерот за внатрешни работи Панче Тошковски претходно најави дека системот ќе биде надграден и во делот на санкционирање на странските регистарски таблички, со цел прекршоците направени во Македонија да не остануваат само евидентирани.
Ваквиот начин на наплата на прекршоци ќе го има и на другите премини.
