Повеќечасовното чекање на граничниот премин „Евзони“ синоќа кулминираше со жестока расправија меѓу неколкумина возачи кои со часови чекаа да ја напуштат Грција и да влезат во Македонија.
На снимка објавена околу полноќ во групата „Патот кон Грција“ се гледа како дел од возачите излегуваат од автомобилите, а нервозата прераснува во жестока вербална расправија. Според сведоштвата, тензијата ја предизвикале возачи кои се обидувале да се вклучат преку ред, што предизвикало бурни реакции кај останатите кои со часови чекале во колоната.
Во расправијата се слушаат и македонски државјани кои нервозно им довикуваат на другите возачи, додека ситуацијата во еден момент се заканувала целосно да излезе од контрола.
Синоќа, како и во текот на целиот ден, на граничните премини Богородица и Евзони имаше километарски колони. Илјадници патници чекаа со часови, а во редиците, покрај патнички автомобили, имаше и голем број автобуси полни со туристи кои се враќаа од одмор или патуваа кон Македонија.
Долгото чекање, високите температури и обидите на поединци да се протнат преку ред дополнително ја зголемија нервозата кај возачите.
Видеото е снимено од член на групата „Патот кон Грција“, кој во моментот на инцидентот се наоѓал на граничниот премин „Евзони“.
