(Видео) Хаос пред спортската сала „Јане Сандански“: „Фемили“ нападнале навивачи на Работнички, има повреден и приведен

Едно лице е повредено, а друго приведено по физички напад меѓу навивачки групи пред спортската сала „Јане Сандански“ во Скопје, потврдија од Министерството за внатрешни работи за „Скопје1“. Според полициските информации, помала група припадници на навивачката група „Фемили“ нападнала навивачи на кошаркарскиот клуб „Работнички“, кои чекале да влезат на спортски натпревар.

Инцидентот бил пријавен денеска, 31 октомври, околу 18:55 часот во СВР Скопје.

— реклама —

Според МВР, повеќе членови на навивачката група „Фемили“ се движеле од улицата „Васко Карангелески“ кон спортската сала „Јане Сандански“, каде што претходно биле собрани околу 50 навивачи на КК „Работнички“.

— реклама —

View this post on Instagram

Во еден момент, помала група од навивачите на „Фемили“ запалила пиротехнички средства, се приближила до навивачите на Работнички и физички ги нападнала.

— реклама —

По нападот, учесниците се оддалечиле во различни правци.

„Едно лице е приведено, а едно лице се здобило со повреди и истото со возило на Итна медицинска помош е пренесено во ГОБ ‘Св. Наум Охридски’ за укажување лекарска помош“, информираат од МВР за „Скопје1“.

Засега не се соопштени детали за тежината на повредите, идентитетот на приведеното лице и евентуалните понатамошни мерки против учесниците во инцидентот.