Неколку лица се повредени при инцидент на аеродромот во Франкфурт, откако паркиран авион „Боинг 787-9“ на германската авиокомпанија Луфтханза се урнал на предниот дел.
Според соопштението на аеродромот, несреќата се случила околу 12:45 часот додека леталото било паркирано на Терминал 1 и се подготвувало за лет кон Лос Анџелес.
Од Луфтханза соопштија дека предниот дел ненадејно попуштил, по што авионот паднал на асфалтот. Во моментот на инцидентот во авионот се наоѓале членови на екипажот и персонал, додека патниците сè уште не биле качени.
Авиокомпанијата потврди дека неколку вработени се здобиле со повреди, но засега не се соопштени точниот број на повредени ниту тежината на нивните повреди.
Луфтханза формираше кризен тим, а надлежните служби започнаа истрага за утврдување на причините за инцидентот.
Германските медиуми објавија дека на социјалните мрежи се појавила снимка на која се гледа моментот кога предното тркало проклизува нанапред, по што доаѓа до уривање на носниот стајни трап. Според дел од извештаите, на снимката изгледа како моторите да го допираат тлото по падот на авионот.
„Боинг 787 Дримлајнер“ е релативно нов модел во флотата на Луфтханза и најчесто се користи за долги интерконтинентални летови.
