(Видео) Истиот хотел, два инцидента: во „Хилтон“ во 1981 беше ранет експретседателот Реган при обид за атентат

Хотелот „Вашингтон Хилтон“, каде што синоќа се случи вооружениот инцидент за време на гала вечерата со американскиот претседател, е истото место каде во 1981 година беше извршен обид за атентат врз поранешниот претседател Роналд Реган.

— реклама —

На 30 март 1981 година, додека го напуштал хотелот по обраќање, кон Реган бил отворен оган од Џон Хинкли Помладиот. Иако преживеал, тогашниот претседател бил тешко ранет, откако куршумот се одбил од оклопното возило и го погодил во градниот кош, предизвикувајќи сериозни повреди, вклучително и пробивање на белодробното крило.

Реган бил итно пренесен во Универзитетската болница „Џорџ Вашингтон“, од каде бил отпуштен по неколку дена лекување. Во истиот напад биле ранети и портпаролот на Белата куќа Џејмс Брејди, агент на Тајната служба и полицаец. Брејди претрпел тешко оштетување на мозокот и останал инвалид до крајот на животот.

— реклама —

Напаѓачот Хинкли подоцна бил прогласен за неосудлив поради психичка неурамнотеженост и бил сместен во установа со високо обезбедување, од каде беше ослободен децении подоцна.

— реклама —

Пред хотелот и денес има обележје што потсетува на настанот од 1981 година, кој останува еден од најпознатите обиди за атентат врз американски претседател.

Синоќешниот инцидент повторно го врати вниманието кон истата локација, отворајќи прашања за безбедноста на настани со висок ризик и историската симболика на местото.