Јахтата, која вчера се запали во близина на јужната страна на островот Чиово, потона во Трогирскиот канал за време на обидот да биде извлечена од местото. Сите шест лица кои биле на пловилото навреме биле евакуирани и нема повредени.
Акцијата за гаснење на пожарот ја координирала Националната централа за усогласување на потрага и спасување на море – MRCC Риека, соопшти хрватското Министерство за море, сообраќај и инфраструктура.
Во интервенцијата учествувале 18 пожарникари со четири возила и две пловила од Доброволното противпожарно друштво Трогир, Јавната противпожарна единица на Град Трогир, како и доброволните противпожарни друштва од Каштела Гомилица и Округ. Помош во акцијата обезбедиле и Капетанијата на пристаништата и Хрватската крајбрежна стража.
И покрај напорите на пожарникарите да го стават пожарот под контрола, моторната јахта потонала на длабочина од 31 метар.
Местото на потонувањето било обезбедувано од противпожарното пловило „Свети Флоријан“, при што не било забележано загадување на морето.
