(Видео) Јапонија се подготвува за ударот на тајфунот Јангми

Јапонските власти издадоа предупредувања поради приближувањето на тајфунот Јангми, кој носи обилни врнежи од дожд и силни ветрови, а веќе предизвика значителни нарушувања во воздушниот сообраќај и штети во делови од земјата.

Според Јапонската метеоролошка агенција, тропската бура утрово се наоѓала западно-северозападно од островот Амами, додека силните ветрови веќе зафатиле делови од Окинава, каде што се повредени повеќе од десет лица.

— реклама —

Метеоролозите предупредуваат дека во регионот Кинки во следните 24 часа може да наврнат до 350 милиметри дожд. Истовремено, се очекува Јангми да донесе обилни врнежи и долж пацифичкиот брег на Јапонија додека се приближува кон копното.

— реклама —

Надлежните институции предупредија и на можноста за издавање предупредувања од четврто ниво, кои подразбираат итна евакуација на населението од загрозените подрачја.

Тајфунот веќе предизвика сериозни проблеми во авионскиот сообраќај. Според последните информации, најмалку 326 летови се откажани, главно на линиите кон и од аеродромите Кагошима и Мијазаки.

Авиокомпаниите, меѓу кои и „Џапан ерлајнс“ и „Ол Нипон ервејс“, предупредија дека се можни дополнителни доцнења и откажувања на летови во зависност од движењето на невремето.

— реклама —

Покрај воздушниот сообраќај, се очекуваат проблеми и во железничкиот систем, вклучувајќи ги и брзите возови Шинкансен.

Јапонските власти ги повикаа граѓаните редовно да ги следат официјалните известувања и навремено да постапуваат по препораките на службите за заштита и спасување.

Јангми е шестиот тајфун во тековната сезона во западниот дел на Пацификот.