(Видео) Земјотрес со јачина од 5,7 степени ја погоди Јапонија, најмалку 22 лица се повредени

Најмалку 22 лица се повредени во силниот земјотрес што во неделата околу 1 часот по полноќ го погоди централниот дел на Јапонија. Потресот предизвикал вознемиреност меѓу населението, а многу луѓе во паника ги напуштале зградите.

Јапонската метеоролошка агенција ја проценила магнитудата на земјотресот на 5,7 степени, додека Американскиот геолошки институт регистрирал магнитуда од 5,5 степени. По главниот потрес следувале и неколку послаби земјотреси.

— реклама —

Епицентарот бил во префектурата Шизуока, на длабочина од околу 40 километри под површината. Потресот бил почувствуван во поширокиот регион, вклучувајќи ги областите околу Аичи, Хамамацу, Кјото, Нара, Јаманаши, каде што се наоѓа планината Фуџи, и Гифу.

— реклама —

Според телевизиските снимки, земјотресот предизвикал материјална штета, меѓу која скршени излози, расфрлани парчиња стакло по улиците и паднати книги од полиците во една книжарница. Дел од повредените паднале по скали додека се обидувале да ги напуштат објектите.

Јапонската метеоролошка агенција предупредила дека во наредните недели може да има силни последователни потреси, особено во следните два до три дена, и ги повикала граѓаните да бидат подготвени.

— реклама —

Како мерка на претпазливост, брзите возови „Шинкансен“ во погодените области сообраќале со намалена брзина поради можноста земјотресите да предизвикаат оштетувања на железничките пруги.

— реклама —

Јапонија се наоѓа во сеизмички активно подрачје, каде што земјотресите се честа појава, пренесе „Бета“.