Најмалку пет лица загинале, а уште неколку се повредени во тешка несреќа на меѓународниот аеродром во Мајами, откако товарен авион на „Амазон“ излетал од пистата и удрил во повеќе возила, соопшти американската Федерална управа за воздухопловство (FAA).
Градоначалничката на Мајами, Даниела Левин Кава, потврди дека бројот на загинати е најмалку пет.
„Можеме да потврдиме дека најмалку пет лица го загубија животот“, изјавила таа на прес-конференција.
Повеќе повредени лица биле пренесени во локалните болници. Шефот на противпожарната служба во Мајами, Раџед Џадалах, соопштил дека три лица се во критична состојба и биле префрлени во локален трауматолошки центар, додека уште две лица се задржани во болница.
Подрачјето на несреќата и понатаму е активно место на интервенција, а властите воспоставиле и посебна телефонска линија за семејствата на можните жртви.
На местото на несреќата биле испратени повеќе од 60 противпожарни единици од округот Мајами-Дејд. Екипите се обидувале да го локализираат пожарот што избувнал по несреќата на авионот „Боинг 767-300“.
Според FAA, авионот продолжил да се движи надвор од пистата околу 14 часот по локално време, откако пристигнал на Флорида од Сан Хуан, Порторико.
По несреќата, меѓународниот аеродром во Мајами го прекинал копнениот сообраќај. Сите писти и рулни патеки биле затворени, а била воведена и целосна забрана за полетување и слетување.
Засега не се соопштени причините поради кои авионот излетал од пистата. Надлежните служби започнале истрага за да се утврдат сите околности што довеле до несреќата.
