Четворица морнари се спасени во јужниот дел на Тихиот Океан, откако кит удрил во нивната 16-метарска јахта и ја потопил. Тие поминале 18 часа во спасувачки чамец пред да ги пронајде контејнерски брод.
Џема и Џереми Купер, Тери Хетерингтон и Мартин Жафре пловеле со јахтата „Tai Tam“ во оддалечен дел од океанот, на околу 250 наутички милји од островот Норфолк, кога почувствувале силен удар, кој го занел пловилото.
Џема Купер, која е од Австралија, раскажала дека силината на ударот ја исфрлила од кормилото. Кога погледнала кон морето, видела група од шест до осум китови.
„Погледнавме од левата страна и видовме група од шест до осум китови. Тогаш ни стана јасно што се случило“, раскажала таа, додавајќи дека животните биле долги колку и самата јахта.
Џереми Купер во моментот на ударот спиел во долниот дел од пловилото, но силниот удар го разбудил. Според него, веднаш било јасно дека ситуацијата е критична.
Управувачкиот систем од десната страна бил целосно уништен, а во јахтата навлегувало големо количество вода. Околу половина час подоцна, во 13 часот по новозеландско време, посадата испратила повик за помош.
Додека новозеландскиот авион „П-8А Посејдон“ трагаше по нив, состојбата на јахтата продолжила да се влошува. Мартин Жафре, столар од Франција, утврдил дека китот го пробил трупот на повеќе места, а кормилото било уништено и управувањето со бродот станало невозможно.
Жафре се обидел да го запре навлегувањето на водата со полиуретанска пена и други материјали. Тој нурнал за да го провери трупот, додека останатите членови на посадата рачно ја исфрлале водата за да спречат поплавување на моторот.
Околу полноќ ја напуштиле јахтата и се префрлиле во спасувачкиот чамец. Потоа го пресекле јажето што го поврзувало чамецот со јахтата, стравувајќи дека пловилото ќе ги повлече со себе додека тоне.
„Седевме во спасувачкиот чамец и гледавме како бродот тоне на стотина метри од нас. Воопшто не беше пријатен момент“, раскажал Купер.
По 18 часа неизвесност, четворицата биле спасени од 143-метарскиот контејнерски брод „MV Sofrana Surville“, кој стигнал до нив следното утро во шест часот.
Морнарите се качиле на бродот со помош на скали, а потоа добиле кафе и разговарале со капетанот.
Снимките на новозеландската војска ги забележале моментите од спасувањето, како и потонувањето на јахтата.
И покрај драматичниот настан, Купер го опишал искуството со позитивен тон:
„Беше прекрасно искуство со ужасен крај, но, за среќа, никој не настрада“.
