(Видео) Ќе има протести, ако нема правосуден на албански: Немам ништо против македонскиот, но јас живеам во моја татковина и ми следува да зборувам албански

Студентите Албанци не се откажуваат од барањето целиот правосуден испит да го полагаат на албански јазик, иако предлогот на министерот за правда Јетон Шасивари предвидува најголемиот дел од испитот да се полага на албански. Студентскиот правобранител на Универзитетот „Мајка Тереза“, Сухејб Мехмеди, порача дека предложеното решение го сметаат за успех, но дека нема да бидат задоволни сè додека и преостанатите два предмета не бидат опфатени со можноста за полагање на албански јазик.

View this post on Instagram

— реклама —

По средбата со министерот, Мехмеди изјави дека студентите бараат целосна примена на правото за кое сметаат дека им припаѓа согласно Уставот и Законот за употреба на јазиците.

„Нашето барање е целиот правосуден испит да го полагаме на албански јазик. Предлогот на министерот е победа за нас бидејќи околу 84 отсто од испитот ќе се полага на албански јазик. Не сме задоволни бидејќи два испита треба да се полагаат на македонски јазик“, рече Мехмеди.

— реклама —

Предлогот на министерот Шасивари предвидува теоретскиот дел, кој опфаќа 12 предмети, да може да се полага на албански јазик, додека практичниот дел, односно два предмета, да се полага на македонски јазик. Но студентите инсистираат јазичната можност да важи за сите делови од испитот.

„Имаме Закон за употреба на јазиците, кој им дозволува на албанските студенти правосудниот испит да го полагаат на албански јазик. Ние не бараме ништо освен да се почитуваат Уставот и законите“, изјави Мехмеди, изнесувајќи го ставот на студентите за законските одредби.

Тој потсети дека досега биле организирани два протеста и дека студентите со излегувањето на улица успеале да го актуализираат своето барање.

— реклама —

„Направивме два протеста, излеговме на улица. Бараме нашите барања да се почитуваат. Ова е наш голем успех бидејќи го добивме тоа што ни следува, но не сме задоволни“, порача Мехмеди.

Студентите најавуваат продолжување на протестите доколку не се овозможи целиот правосуден испит да се полага на албански јазик.

Министерот Шасивари, пак, смета дека решението треба да се бара преку дијалог со студентите и деканите на петте правни факултети, со цел да се постигне правно издржано и европски усогласено решение.

Според Мехмеди, министерот ветил нова средба со деканите и професорите, но студентите остануваат на барањето сите предмети од правосудниот испит да можат да се полагаат на албански јазик.