(Видео) Ќе се извини ли за „Северна“? Андреј Петров: Не

Андреј Петров не смета дека треба да се извини за промената на името на државата. Поранешниот градоначалник на Карпош од СДСМ, кој важи за близок до Бранко Црвенковски и е дел од платформата „12:05“, која бара смена на Венко Филипче и на партиското раководство, во „Претрес со Ландов“ одговори негативно на директното прашање дали некогаш јавно ќе се извини за „Северна Македонија“.

Сепак, призна дека прашањето за него е болно. Промената ја опиша како „тешка кнедла“ што државата ја проголтала за да стане членка на НАТО и да ја зацврсти својата територијална безбедност.

— реклама —

Според Петров, за мала и сиромашна држава членството во Алијансата има значење што не може да се занемари при оценувањето на Преспанскиот договор.

Истовремено, смета дека во минатото биле испуштени можности спорот да се реши со име само за меѓународна употреба. Во тој контекст ги спомена и последиците за граѓаните, меѓу кои промената на личните документи.

— реклама —

„Јас цело време сум викал Македонија“, рече Петров, посочувајќи дека не е државен функционер.

— реклама —

За очекувањата дека промената на името брзо ќе го отвори и патот кон Европската Унија, неговата оценка беше покритична. Смета дека верувањето во брз европски напредок било наивно и дека недостигале гаранции.

Петров оцени дека промената на името сега е свршен чин, посочувајќи дека ниту актуелната власт не ја променила. Според него, тоа покажува дека и таа ја зема предвид стабилноста на државата при односот кон договорот.

— реклама —

Гледајте го поткастот каде има и други брутални прашања и одговори:

„Претрес“ на Андреј Петров: Го менуваат Филипче, го враќаат Бранко? А Македонија? Гледај на LANDOV.MK 3:02:39