(Видео) „Ќе умреме“: Патници во паника додека авионот на „Туркиш ерлајнс“ се борел со силното невреме

Патниците на лет од Истанбул кон Тунис доживеале драматични моменти откако авионот налетал на силно невреме при приближувањето кон Тунис. Поради силните турбуленции, од кабината се слушале врисоци, додека пилотот неколкупати се обидувал да слета.

Авионот на „Туркиш ерлајнс“, Ербас А321, полетал од Истанбул на 10 септември, а проблемите започнале при приближувањето кон Тунис. Авионот влетал во невремето и почнал силно да се тресе.

— реклама —

Пилотот се обидел да слета на аеродромот „Тунис-Картхаге“, но ситуацијата станала особено драматична при третиот обид. Една од патничките, која го снимила настанот, рекла дека во еден момент ѝ се чинело оти авионот нагло почнува да губи височина.

„Ќе умреме“, се слуша како вика еден од патниците на снимката, која се проширила на социјалните мрежи. Останатите патници врескале додека авионот минувал низ силните турбуленции.

— реклама —

— реклама —

„Никогаш во животот не сум се плашела толку за својот живот“, рекла жената која го снимила настанот.

По неколкуте неуспешни обиди за слетување, патниците наводно го молеле пилотот да слета на друг аеродром или дури во друга земја, за повторно да не минуваат низ силните турбуленции.

— реклама —

Летот на крајот бил пренасочен кон аеродромот Енфида-Хамамет, околу 90 километри јужно од Тунис. Авионот безбедно слетал, по што патниците го поздравиле слетувањето со аплауз.