На денешната прес-конференција, портпаролката и членка на Извршниот одбор на СДСМ, Богданка Кузеска денеска ја обвини Владата и премиерот Христијан Мицкоски дека ја манипулираат јавноста околу измените на Изборниот законик, оценувајќи дека прашањето за гласањето на дијаспората се користи за политички цели.
Кузеска истакна дека партијата не е против правото на дијаспората да гласа, туку против, како што рече, модели што не обезбедуваат соодветна контрола на изборниот процес.
Според Кузеска, дијаспората и досега имала можност да гласа согласно постојниот изборен модел, а предложеното електронско гласање или гласањето по пошта, без соодветни гаранции, според неа, отвора простор за изборни злоупотреби.
Таа праша зошто во земјава гласањето се спроведува со биометриска идентификација, отпечаток од прст и други контролни механизми, додека за гласањето од странство се предлагаат, како што наведе, решенија без реална контрола.
Кузеска обвини дека ВМРО-ДПМНЕ преку измените на Изборниот законик се обидува да создаде нов механизам за манипулација со изборниот процес и оцени дека законот се користи како изговор за, како што рече, неисполнување на Реформската агенда.
Од СДСМ порачаа дека нема да поддржат решенија кои, според нив, би овозможиле изборни злоупотреби и повторија дека остануваат на ставот за фер и демократски избори, како и за продолжување на европскиот пат на државата.
