(Видео) Левица: „ДПМНЕ ги одби амандманите на Левица за заштита на жртвите на сексуално и семејно насилство“

Пратеничката Јована Мојсоска на денешната седница соопшти дека парламентарното мнозинство ги одбило двата амандмани што пратеничката група ги поднела на расправата за Предлог-ребалансот на Буџетот, а со кои се барало обезбедување дополнителни средства за воспоставување кризни центри за жртви на сексуално насилство и за изградба на шелтер-центри и советувалишта за жртви на семејно насилство.

— реклама —

Пратеничката Јована Мојсоска, образложувајќи го амандманот за издвојување 30 милиони денари за отворање и функционирање на пет кризни центри за жртви на сексуално насилство, посочи дека и покрај законската обврска донесена во 2021 година, Министерството за здравство сè уште нема воспоставено ниту еден таков центар.

Според неа, во периодот од 2020 до 2024 година во Македонија биле евидентирани 455 жртви на сексуално насилство, од кои околу 90 проценти се девојчиња, поради што државата, како што рече, треба да ги исполни своите обврски преземени со националните стратегии и меѓународните договори.

— реклама —

Со вториот амандман, Левица предложи обезбедување шест милиони евра за отворање 24 шелтер-центри и осум советувалишта за жртви на семејно насилство.

— реклама —

Мојсоска истакна дека за целосно воспоставување на ваквите услуги се потребни околу 6,5 милиони евра годишно, што, според неа, претставува само 0,1 отсто од државниот буџет. Таа додаде дека во моментов државата за сите шелтер-центри заедно издвојува околу 60 илјади евра годишно.

Според Левица, средствата требало да се обезбедат преку намалување на дел од ставките предвидени за НАТО-интеграцијата, со образложение дека безбедноста не подразбира само воена опрема, туку и заштита на жртвите на насилство.

И покрај овие аргументи, парламентарното мнозинство не ги прифати двата амандмани, соопштија од Левица.