(Видео) Макрон прекина говори на самит во Најроби: „Ова е непочитување“

Францускиот претседател Емануел Макрон накратко ја прекина програмата на самитот Africa Forward во Најроби за да ги укори дел од учесниците поради бучава за време на говорите.

Макрон се искачи на сцената и побара од присутните да покажат почит кон говорниците, оценувајќи дека ваквото однесување е несоодветно за дискусии посветени на културата и младите.

— реклама —

„Извинете. Еј, еј. Жал ми е, но невозможно е да се зборува за култура и да имаме инспиративни луѓе кои држат говор додека има толкава бучава. Тоа е целосно непочитување“, порача Макрон.

— реклама —

Тој додаде дека оние што сакаат да разговараат за други теми можат да го напуштат просторот или да користат посебни простории за билатерални средби.

— реклама —

„Ако сакате да останете тука, слушајте ги луѓето и сите ќе играме по истите правила“, рече францускиот претседател, по што дел од публиката реагираше со аплауз, а редот во салата беше воспоставен.

Самитот Africa Forward е заедничка иницијатива на Емануел Макрон и кенискиот претседател Вилијам Руто и има цел да ги редефинира односите меѓу Франција и африканските држави преку соработка во економијата, иновациите, инвестициите и глобалното управување.

На форумот учествуваат африкански лидери, претставници на Африканска Унија, меѓународни финансиски институции, инвеститори и претставници на бизнис и креативниот сектор. Организаторите најавуваат повеќе од 1.500 учесници од Африка и Франција.