(Видео) Манасиевски: Граѓаните се труеле со години, а СДС и Филипче молчеле иако добиле анализи од приближно 400 испитувања за загадена вода

На денешната прес-конференција, портпаролот на партијата Валентин Манасиевски обвини дека за време на мандатот на Венко Филипче како министер за здравство институциите располагале со информации за стотици случаи на неисправна вода за пиење, без јавноста да биде навремено информирана.

— реклама —

Манасиевски изјави дека, според нив, постоеле резултати од приближно 400 испитувања на вода за кои не било постапено, ниту граѓаните биле предупредени да не ја користат водата за пиење.

— реклама —

Манасиевски посочи повеќе примери од 2021 година, меѓу кои, како што рече, неисправна вода во здравствениот дом во Македонска Каменица, на чешма пред училиште во Зелениково, како и во локални водоводни системи во Дебарца и Требеништа, каде што, според него, биле утврдени микробиолошки неисправности и присуство на бактеријата Ешерихија коли. Тој наведе дека слични наоди имало и за водата во одморалиштето „Пониква“ кај Кочани.

Од ВМРО-ДПМНЕ прашуваат зошто, според нив, тогашното раководство на Министерството за здравство не презело мерки и не ја информирало јавноста за резултатите од анализите.

— реклама —

Партијата соопшти дека за случајот се поднесени пријави до Министерството за внатрешни работи и побара Основното јавно обвинителство да отвори истрага и да утврди дали со непостапувањето и непријавувањето на резултатите било загрозено здравјето на граѓаните.

— реклама —

Од ВМРО-ДПМНЕ порачаа дека никој не смее да биде изземен од одговорност, без оглед на функцијата што ја извршувал.