(Видео) Манасиевски: За кубење коса 4 години, за 150 ќебапи 3 години, а за Ласкарци, Модуларна и Мазут, одговорност нема

Портпаролот на ВМРО-ДПМНЕ, Валентин Манасиевски, денеска на прес-конференција обвини дека во македонското правосудство постојат двојни стандарди и дека различно се постапува зависно од тоа кој е опфатен со судските постапки.

— реклама —

– За кубење на коса се добиваат четири години затвор, за кражба на 150 ќебапи три години затвор, а за случајот „Ласкарци“, каде што загинаа 16 луѓе, за модуларната болница, каде што животот го загубија 14 луѓе, или за случајот „Мазут“, вреден 167 милиони евра, имаме нула години затвор и нула одговорност, рече Манасиевски на прес-конференција.

Тој оцени дека, според ВМРО-ДПМНЕ, за обичниот граѓанин важи законот, додека, како што наведе, кога станува збор за луѓе и интереси поврзани со СДСМ и ДУИ, „нивните инсталации во правосудството веднаш се ставаат во нивна заштита“.

— реклама —

– Тоа е правдата што ја оставија и ја ветуваа СДСМ и ДУИ. Затоа граѓаните немаат доверба во правосудството, рече Манасиевски.

— реклама —

Портпаролот на ВМРО-ДПМНЕ додаде дека, според него, не е прифатливо за кражба на ќебапи да има затворска казна, додека за случаи во кои има десетици загубени човечки животи граѓаните со години да чекаат конечна правда.

– Правосудството не смее да биде штит на СДСМ и ДУИ. Законот мора да важи еднакво за сите, порача Манасиевски.

— реклама —