(Видео) Масакр на аеродромот во Ријад: 12 загинати, повеќе од 300 повредени

Дванаесет лица загинаа, а повеќе од 300 беа повредени во вчерашниот ракетен напад врз меѓународниот аеродром „Крал Калид“ во Ријад, соопштија саудиските власти. Одговорноста за нападот ја презедоа јеменските Хути, кои имаат поддршка од Иран.

Меѓу загинатите има четворица државјани на Саудиска Арабија, како и државјани на Бангладеш, Палестина, САД, Египет, Јордан, Сирија и Судан. Дел од повредените се во критична состојба.

Проектилот погодил дел од аеродромскиот комплекс во кој се наоѓаат терминалите 3 и 4, наменети за домашни летови. Ова бил трет напад врз аеродромот во Ријад во последните неколку дена.

— реклама —

По нападот, сите операции на аеродромот биле привремено прекинати, а летовите кон Ријад биле пренасочени кон други аеродроми.

— реклама —

Еден очевидец изјавил за Reuters дека по експлозијата видел неколку повредени лица како лежат во терминалот. Друг повреден патник раскажал дека непосредно пред ударот забележал нешто на небото, по што дел од таванот се урнал во близина на излезот за качување во авион.

Саудиската управа за цивилно воздухопловство и по претходните напади известила за загинати, повредени и материјална штета. Во нападите на 8 октомври загинале тројца саудиски државјани, а еден ден претходно, во посебен напад врз аеродромот во Ријад, загинал државјанин на Судан.

По најновиот напад, Хутите порачаа дека авиокомпаниите треба да го избегнуваат саудискиот воздушен простор, кој го прогласија за зона на воени операции.

— реклама —

Американскиот претседател Доналд Трамп по нападот изјави дека САД ја разгледуваат можноста да им се приклучат на саудиските напади врз Хутите.

„Можеби ќе го направиме тоа. Ќе ја разгледаме таа можност. Дури сега дознавме за овој најнов напад, па ќе донесеме одлука. Дејствуваме многу брзо“, изјави Трамп.

Подоцна најави разговор со саудискиот престолонаследник Мохамед бин Салман и порача дека она што се случило „не е прифатливо“.

Американската амбасада во Ријад ги предупреди своите државјани да ги избегнуваат аеродромот и околните области.