(Видео) Масовни протести во Франција, вандализирано градското собрание во Марсеј

Илјадници луѓе излегоа на улиците во повеќе француски градови поради високите трошоци за живот и влошената состојба на јавните услуги, а протестите во саботата прераснаа во судири со полицијата, која употреби солзавец. Станува збор за едни од најнасилните протести во Франција во последните години, објави „Ројтерс“.

Француските власти соопштија дека до пладне, надвор од Париз, биле регистрирани 140 протести со вкупно 32.800 учесници. За немирите ги обвинија групите што ги опишуваат како „екстремна левица“.

Протестите започнале минатиот месец во средните училишта во посиромашните северни предградија на Париз. Незадоволството поради недостигот од наставници и лошите услови во училиштата прераснало во пошироко движење во кое се отвораат прашања за нееднаквоста, јавната потрошувачка и животниот стандард.

— реклама —

Министерството за внатрешни работи пријавило насилни инциденти во неколку градови, меѓу кои вандализам во Марсеј и напади врз полицијата, медиумите и јавните објекти. Во центарот на Париз се распоредени засилени полициски сили, особено во близина на Елисејските полиња и Триумфалната капија. Овие локации биле исклучени од маршрутите на два одобрени протеста.

Демонстрантите со флуоресцентни елеци блокирале улици, потсетувајќи на движењето „Жолти елеци“, кое се појави за време на претходниот претседателски мандат на Емануел Макрон.

— реклама —

Градоначалникот на Марсеј изјавил дека градското собрание било вандализирано. Тој додал дека во градот пристигнуваат засилувања на полицијата, согласно договорот постигнат во разговор со премиерот и министерот за внатрешни работи.

„Протестираме затоа што трошоците за живот станаа неподносливи, горивото е прескапо, а средношколци низ целата земја се нападнати и повредени само затоа што бараат повеќе наставници и нормални услови за учење“, изјавила 19-годишната демонстрантка Лола во Париз.

Сведок изјавил дека група од стотина луѓе се упатила кон почетокот на протестот, притоа извикувајќи навреди кон полицијата.

— реклама —

Претседателот Макрон, кој во петокот повика на смирување на состојбата, го привршува мандатот во услови на политичка расцепканост и засилен економски притисок. Владините напори за намалување на јавниот долг не ги смириле инвеститорите, поради што трошоците за задолжување на државата се искачиле на највисоко ниво во повеќе од две децении.

Полициските тактики се најдоа на удар на критики по повредувањето на повеќе демонстранти. Меѓу нив е и тинејџер кој ја загубил шаката откако подигнал шок-бомба. Премиерот Себастијан Лекорни изјавил дека истовремено биле повредени и повеќе од 900 полицајци.

Телото задолжено за надзор над полицијата истражува најмалку 20 пријави за полициско насилство. Франција привремено ја запрела употребата на шок-бомби на студентските протести, но министерот за внатрешни работи Лоран Нунез најавил дека тие би можеле повторно да бидат употребени во саботата.

— реклама —

Повиците на социјалните мрежи до ветераните на претходните протести, се чини, го прошириле кругот на учесници, што би можело да доведе до уште помасовни собири.

Движењето „Жолти елеци“ се појави во 2018 година како реакција на даноците на дизел-горивото, но прерасна во поширок протест против трошоците за живот и нееднаквоста. Протестите се смирија откако Макрон најави намалување на даноците во вредност од повеќе милијарди евра.

Јаник Мају, наставник од местото Ла Креш во западна Франција и учесник во движењето „Жолти елеци“, изјавил дека за саботните протести биле организирани неколку локални собири и дека синдикатите повикале на учество.