Илјадници граѓани шести ден по ред протестираат пред седиштето на албанската влада во Тирана, спротивставувајќи се на контроверзниот туристички проект во заштитеното подрачје Звернец и барајќи оставка од премиерот Еди Рама.
Протестите во меѓувреме се проширија и во други градови, меѓу кои Валона, Драч и Елбасан, а поддршка пристигнува и од албанската дијаспора во САД и Германија.
Во центарот на спорот е луксузен туристички проект поврзан со Џаред Кушнер, зет на американскиот претседател Доналд Трамп. Планот предвидува развој на туристички комплекс на островот Сазан и дел од јужното албанско крајбрежје преку инвестицискиот фонд „Афинити партнерс“, основан од Кушнер.
Проектот доби статус на „стратешки инвеститор“ од албанската влада, што овозможува забрзана постапка за добивање дозволи и согласности.
Демонстрантите тврдат дека не протестираат само поради Звернец, туку и поради, како што велат, иднината на цела Албанија. На протестите беа упатени повици за оставки и на премиерот Еди Рама и на лидерот на опозицијата Сали Бериша.
Во меѓувреме, Рама ги отфрли обвинувањата и оцени дека протестите се дел од „хибридна војна“ против Албанија.
„Тоа не е еколошко прашање, туку хибридна војна. Зад протестите стојат Иранци, кои и претходно биле вклучени во слични напади“, изјави Рама на самитот ЕУ – Западен Балкан во Тиват.
Во интервју за „Еуроњуз“, албанскиот премиер додаде дека противењето на проектот се поттикнува преку ботови, лажни профили на социјалните мрежи и надворешни актери, кои ја користат загриженоста за животната средина.
Рама исто така негираше дека постои каков било таен договор поврзан со проектот.
„Се шири приказна дека станува збор за таен договор меѓу мене и Бенјамин Нетанјаху преку Џаред Кушнер. Тоа е целосна измислица“, рече тој.
Албанскиот премиер нагласи дека конечниот проект сè уште не е доставен до институциите и дека секој иден предлог ќе биде подложен на јавна расправа и законски процедури.
И покрај растечкиот притисок од улицата, Рама порача дека протестите нема да ја одредат судбината на инвестицијата.
„Тоа никогаш нема да се случи. Не додека јас сум на власт“, изјави албанскиот премиер.
