(Видео) Мециновиќ: ДПМНЕ ја оплакува демографската катастрофа, а без ниту еден аргумент го одби Предлог-законот на Левица за станбена поддршка на младите семејства

Предлог-законот на Левица за семејна и станбена поддршка на младите семејства не доби поддршка од владејачкото мнозинство на собраниската Комисија за финансирање и буџет. Пратеникот Амар Мециновиќ обвини дека предлогот бил отфрлен без аргументирана расправа, забелешки или предлози за негово подобрување.

— реклама —

Мециновиќ оцени дека станбената несигурност е една од причините за иселувањето и демографското празнење на Македонија. Според податоците што ги презентирал, долгот на македонските домаќинства по основ на станбени кредити изнесува околу две милијарди евра, а за една година се зголемил за 273 милиони евра, односно за 16,6 отсто. Во последните две години растот достигнал 35 отсто, додека речиси 40 отсто од вкупните кредитни обврски на домаќинствата се однесуваат на станбени кредити.

— реклама —

Предлогот на Левица предвидувал државата да презема дел од главнината на кредитот за прв дом при раѓање или посвојување дете, со директна уплата кон банката и намалување на месечната рата. Мерката, според партијата, би ги опфатила и постојните станбени кредити склучени во последните пет години, под определени законски услови.

Мециновиќ тврди дека Левица предложила заедничко усогласување на решението, вклучително и разговори за висината на државната поддршка, но мнозинството го одбило предлогот. Тој ја критикуваше власта дека ја истакнува демографската криза како национален приоритет, но не поддржува конкретни мерки за подобрување на материјалната сигурност на младите семејства.

— реклама —

Пратеникот потсети и дека во 2011 година бил донесен закон за субвенционирање станбени кредити, оценувајќи дека тогашниот модел денес не одговара на изменетите пазарни услови. Според Левица, претходно биле одбиени и нивните предлози за ограничување на највисоките кирии, намалување на задолжителното учество за станбени кредити на младите и воведување државни гаранции.

— реклама —