Јапонските власти ја уловија мечката што неколку дена талкаше низ станбени населби во градот Уцуномија, на околу 100 километри северно од Токио, предизвикувајќи паника кај жителите и затворање на десетици училишта.
Животното, за кое се проценува дека тежи околу 100 килограми, првпат било забележано во саботата навечер, по што била покрената голема потрага во која биле вклучени полицијата, градските служби и дронови.
Мечката била успиена со стрела за омамување и потоа пренесена во кафез. За време на акцијата, полицијата блокирала делови од градот, а жителите биле повикани да останат во своите домови.
Поради присуството на мечката, од претпазливост биле затворени сите 94 основни и средни училишта во градот. Мерката била продолжена и следниот ден поради сомнежи дека во околината можеби се движи уште една мечка.
Јапонските власти сè уште не одлучиле што ќе се случи со уловеното животно. Во зависност од околностите, мечките во вакви случаи можат да бидат пуштени во природа, преместени или, во одредени ситуации, да бидат усмртени.
Јапонија во последните години бележи сè повеќе инциденти со мечки, вклучително и во урбани средини. Според податоците на тамошното Министерство за животна средина, во текот на 2025 година биле регистрирани рекордни 238 напади со жртви, од кои 13 завршиле со смртен исход.
Експертите предупредуваат дека климатските промени и намалената достапност на природна храна ги принудуваат мечките сè почесто да се приближуваат до населените места во потрага по храна.
