(Видео) Мицкоски до Бугарија: „Во Европа ќе влеземе со исправена глава, не со свиткана и понижена кичма“

„Вистинската европска иднина мора да биде иднина во која ќе влеземе со исправена глава, не со свиткана и понижена кичма“, порача премиерот Христијан Мицкоски, говорејќи за односите со Бугарија и условите за продолжување на европската интеграција на Македонија. Тој нагласи дека државата сака соработка со источниот сосед, но нема да се откаже од сопствениот идентитет, јазик и достоинство.

Во обраќањето по повод 11 Октомври, Денот на народното востание, Мицкоски истакна дека Македонија не бара посебен третман, туку почитување на истите принципи што важат за останатите држави.

View this post on Instagram

„Ние не бараме светот да се прилагодува на нас. Ние бараме да бидеме третирани со иста почит со која ние ги третираме останатите“, рече премиерот.

Тој порача дека разликите со Бугарија не треба да прераснат во непријателство и дека минатото не смее да биде пречка за идната соработка, но истовремено нагласи дека компромисите не можат да подразбираат откажување од националното достоинство.

— реклама —

„Нема да ја градиме иднината врз омраза, нема да ги претвораме разликите во непријателства, нема да дозволиме минатото да биде пречка за соработка. Но нема ниту да се откажеме од сопственото достоинство, бидејќи вистинското пријателство не бара откажување од себе; вистинското пријателство се темели на заемна почит“, изјави Мицкоски.

Според него, членството во Европската Унија останува стратешка цел, но државата треба да го продолжи европскиот пат без чувство на пораз или понижување.

„Вистинската европска иднина мора да биде иднина во која ќе влеземе со исправена глава, не со свиткана и понижена кичма. Не со чувство на пораз и горчина, туку со чувство на припадност“, рече тој.

Мицкоски нагласи дека македонскиот идентитет, јазик и историја не можат да бидат предмет на преговарање.

— реклама —

„Достоинство кое не е предмет на преговарање. Сакаме европска иднина, силни сојузништва и пријателства, но со исправена глава. Македонскиот идентитет и јазик и историја се нашето многувековно наследство, нашата гордост“, порача премиерот.

Тој посочи дека Македонија и Бугарија се поврзани преку соседството, историјата и заедничката иднина на регионот, но дека различните толкувања на минатото не треба да бидат пречка за меѓусебното почитување.

„За минатото можеме да имаме различни толкувања. За иднината, мора да имаме заедничка одговорност. Да изградиме односи во кои никој нема да мора да го негира другиот за да се потврди себеси“, рече Мицкоски.

Премиерот упати порака и до европските партнери, нагласувајќи дека македонскиот јазик и идентитет не треба да се третираат како пречка за членството во Унијата.

„Нашиот јазик не е пречка за нашата европска иднина. Тој е дел од европското културно богатство. Идентитетот не е проблем што треба да се реши, туку достоинство што треба да се почитува. Не бараме Европа да избира помеѓу нас и нив. Бараме европските принципи да важат подеднакво за сите“, изјави тој.

— реклама —

Мицкоски истакна дека не сака идните генерации да ја наследат недовербата меѓу двете држави, туку способноста да ги надминуваат отворените прашања.

„Не сакам генерациите што доаѓаат да ја наследат нашата недоверба. Сакам да ја наследат нашата храброст да ги решаваме проблемите“, рече премиерот.

Во продолжение на обраќањето тој повика на политичко единство околу стратешките интереси на државата, оценувајќи дека партиските разлики не смеат да бидат поважни од заедничката одговорност.

„Нашата татковина е поголема од секоја партија и секоја влада. Политичките разлики не смеат да бидат посилни од заедничката одговорност. Потребно ни е единство околу големите стратешки цели“, порача Мицкоски.

Тој нагласи дека пред државата е период на големи промени и дека се неопходни реформи, инвестиции, подобра инфраструктура, современо образование, посилно здравство и институции што ќе им служат на граѓаните.

Поврзувајќи ги актуелните предизвици со значењето на 11 Октомври, премиерот порача дека слободата што ја наследиле сегашните генерации носи одговорност за иднината на државата.

„Слободата што ја наследивме не е наша заслуга. Но државата што ќе ја оставиме зад нас ќе биде наша одговорност“, рече тој.

Во завршниот дел од обраќањето Мицкоски упати и политичка порака до своите противници, оценувајќи дека алтернативата на политиките што ги застапува Владата би значела враќање кон непринципиелни политики.

„Или принципи, или тие што тргуваат со нив. Или силна татковина, или држава на продажба. Тоа е изборот“, порача премиерот, додавајќи дека неговите политички противници, според него, зборуваат за сè, но го избегнуваат народот.