Премиерот Христијан Мицкоски порача дека почитувањето на државната химна треба да биде „свето“ за сите граѓани, без разлика на нивната етничка припадност, откако новинар го праша дали, по одлуката на Гази Баба за интонирање на македонската химна во училиштата, би било во ред општини со мнозинско албанско население да побараат интонирање на албанската химна.
„Добро, понекогаш треба човек и да не одговара на некои прашања, но ајде, сепак сте медиум и треба да дадам одговор и на ова прашање“, рече Мицкоски на почетокот од одговорот.
Тој нагласи дека државната химна е утврдена со Уставот и законите и дека нејзиното почитување не треба да зависи од етничката припадност на граѓаните.
„Таа е државна химна. Без разлика на етничката припадност, ние сме граѓани на оваа земја и треба да ги почитуваме симболите на оваа земја“, рече Мицкоски.
Според него, истовремено треба да се почитуваат и националните симболи на етничките заедници, во рамките утврдени со закон.
„Интонирањето на државната химна во државата претставува обврска на сите граѓани да ја почитуваат и да се поклонат, без разлика од каква етничка припадност се, дали се Македонци, Албанци, Власи, Срби, Роми или останати. Почитувањето на државната химна треба да е свето, исто како што треба да биде коректно и почитувањето на националните симболи на етничките заедници“, додаде премиерот.
Мицкоски рече дека ја следи дебатата што се води околу ова прашање и дека е „вчудовиден“ што интонирањето на државната химна воопшто станува тема за ваква полемика.
„Мислам дека во 21 век, во ера на вештачка интелигенција, во ера на дата-центри, во ера на нови предизвици кои ги има човештвото, ние да зборуваме за интонирање на државна химна... Без разлика колку ви се допаѓа или не, оваа држава ви овозможила на вас и на вашето семејство да се оформите. Треба да се почитува“, рече Мицкоски.
Новинарот појасни дека не го оспорува интонирањето на македонската химна, туку прашува што доколку општини со мнозинско албанско население побараат интонирање на албанската химна или ако ВЛЕН, како владин коалициски партнер, побара промена на државната химна за таа да добие мултиетнички карактер.
Мицкоски повторно се повика на законските правила, но истовремено упати повик државната химна да се интонира во училиштата во сите општини.
„Повикувам во сите општини, без разлика на етничката димензија, државната химна да се интонира во училиштата“, рече Мицкоски.
Прашањето беше поставено откако градоначалникот на Гази Баба, Бобан Стефковски, објави дека секој понеделник наставата во основните училишта на територијата на општината ќе започнува со интонирање на македонската химна.
