Тони Михајловски, првенец на Македонскиот народен театар, ја освои наградата за најдобар актер на вечерта на јубилејното 30. издание на фестивалот „Актерски свечености – Миливоје Живановиќ“ во Пожаревац. Признанието му беше доделено веднаш по изведбата на претставата „Народен пратеник“, која беше одлично прифатена од публиката и стручната јавност.
Претставата, работена по текст на Бранислав Нушиќ во режија на Егон Савин, е во продукција на Македонскиот народен театар и веќе подолг период бележи значајна меѓународна сценска активност како дел од балканската турнеја. Таа гостуваше на повеќе престижни сцени во регионот, меѓу кои во Народното позориште во Белград, Црногорското народно позориште во Подгорица, како и на повеќе сцени низ Босна и Херцеговина, а беше изведена и на реномирани фестивали како „Стериино позорје“.
Фестивалот „Актерски свечености – Миливоје Живановиќ“, кој се одржува од 1995 година во Центарот за култура во Пожаревац, важи за еден од најзначајните театарски настани во регионот, посветен на еден од најголемите српски актери Миливоје Живановиќ. Во рамки на програмата се одржуваат пет натпреварувачки вечери, а најдобрите актери конкурираат за главната награда – статуетaта „Миливоје Живановиќ“.
„Народен пратеник“ има освоено и повеќе значајни признанија, меѓу кои главната награда „Борисав Станковиќ“ за најдобра претстава во целина на фестивалот „Борини позоришни дани“ во Врање, како и специјалната „Стериина награда“ за колективна актерска игра.
Во претставата настапуваат Александар Микиќ, Дарја Ризова, Тони Михајловски, Јордан Симонов, Тања Кочовска и други членови на ансамблот. Претходно, на 6 април, претставата гостуваше и на фестивалот „5-РЕ“ во Велес, каде беше одлично примена, а Тања Кочовска доби награда за споредна женска улога.
