Телефонот „Trump Mobile T1“, кој со месеци беше предмет на потсмев и сомнежи дали воопшто ќе се појави на пазарот, конечно почна да пристигнува кај дел од купувачите кои го нарачале во претпродажба.
Технолошкиот портал CNET објави видео од распакување на уредот на YouTube, откривајќи што точно добиваат корисниците во кутијата.
За разлика од повеќето модерни телефони од Apple, Samsung или Google, каде најчесто доаѓа само USB-C кабел, „Trump Phone“ вклучува и полнач, како и проѕирна заштитна маска.
Во пакувањето има:
USB-C кабел
полнач
проѕирна силиконска маска
Сепак, засега нема информации за брзината на полнење или техничките детали на адаптерот.
CNET наведува дека телефонот има пластичен заден дел, а уште при првото вклучување се инсталирани апликациите „Truth Social“ и „Doctegrity“.
Дополнително, фотографиите направени со телефонот автоматски добиваат воден жиг со логото „T1“, како и датум и време. Засега не е познато дали оваа функција може да се исклучи.
Во технолошките кругови веќе се појавија сомнежи дека „Trump Mobile T1“ не е целосно нов уред, туку ребрендирана верзија на HTC U24 Pro од 2024 година.
Истовремено, дел од американските технолошки портали предупредуваат дека веб-страницата на „Trump Mobile“ можеби има безбедносни пропусти преку кои би можеле да протекуваат кориснички податоци.
Поради тоа, повеќе специјализирани медиуми во САД не им препорачуваат на корисниците да инвестираат или да купуваат ваков уред.
