Параглајдер со две лица завршил на пешачка патека во Охрид, при што била урната и канделабра, информира Министерството за внатрешни работи.
Според МВР, настанот бил пријавен на 26 април во 21:05 часот, а се случил околу 14:00 часот кај каналот „Студенчишта“.
„На 26.04.2026 во 21:05 часот во СВР Охрид е пријавено дека околу 14:00 часот две лица со параглајдер се спуштиле на пешачката патека после каналот „Студенчишта“ во Охрид, по што паднале на плочникот“, соопштија од МВР.
При падот, дел од опремата закачила улична инфраструктура.
„Притоа, дел од опремата на параглајдерот ја зафатила електричната канделабра поставена на централниот дел од патеката која се скршила и паднала на пешачката лента“, информираат од МВР.
Од полицијата велат дека засега нема пријава за повредени лица.
„Во СВР Охрид нема пријава за повредени лица, а во консултација со јавен обвинител, се преземаат мерки за расчистување на случајот“, соопштија од МВР.
