(Видео) На местото каде што беше прегазена Фросина – мотоциклист дивеел, а со снимка се исмева и „Сејф сити“

Снимка од мотоциклист кој со голема брзина се движи по булеварот „Партизански одреди“ во Скопје, претекнува непосредно пред пешачки премин и го подигнува моторот на едно тркало, е објавена на социјалната мрежа Тикток. Особено вознемирувачки е што маневарот се изведува кај Универзалната сала, на местото каде што на 29 јануари 2025 година беше смртно прегазена 22-годишната Фросина Кулакова.

На видеото е испишана пораката „сејф сити 😉“, со емотикон што намигнува, што може да се протолкува како исмевање на системот за автоматско санкционирање на сообраќајните прекршоци.

Мотоциклистот, според прикажаното на снимката, претекнува друго возило непосредно пред пешачкиот премин, а потоа го подигнува предното тркало и продолжува да вози само на задното. Точната брзина не може да се утврди само од видеото, но начинот на управување отвора сериозни прашања за безбедноста на останатите учесници во сообраќајот.

— реклама —

Токму на оваа локација, во близина на Универзалната сала, животот го загуби Фросина Кулакова. Таа беше прегазена додека го преминуваше булеварот на обележан пешачки премин. Според обвинителството, возачот на автомобилот се движел со неприспособена брзина, поминал на црвено светло, бил под дејство на алкохол и немал возачка дозвола.

View this post on Instagram

Нејзината смрт предизвика масовни протести и барања за поголема безбедност на улиците, построги контроли и доследно санкционирање на несовесните возачи.

— реклама —

Новата снимка се појавува во период кога Министерството за внатрешни работи го проширува опфатот на системот „Безбеден град“, познат и како „Сејф сити“.

Министерот за внатрешни работи Панче Тошковски неодамна најави дека камерите ќе можат автоматски да препознаваат и мотоциклисти кои не носат заштитна кацига. Надградбата треба да користи вештачка интелигенција за откривање на овој прекршок.

— реклама —

Од крајот на август системот веќе започна да ги детектира и мотоциклите што се движат со брзина поголема од дозволената.

Тошковски на почетокот на октомври, при посета на настан посветен на безбедноста на мотоциклистите, порача дека целта на засилените контроли и системот „Безбеден град“ е намалување на сообраќајните незгоди и човечките жртви.

„Овие резултати не се само бројки. Зад секоја бројка стои човечки живот, семејство и нечија иднина. Безбеден град, засилените контроли, едукацијата и, пред сè, одговорното однесување на граѓаните покажуваат дека можеме суштински да ја промениме сообраќајната култура. Нашата цел е јасна – помалку незгоди, помалку повредени и што е можно помалку загубени човечки животи“, изјави Тошковски.

МВР најавуваше и продолжување на засилените контроли на мотоциклистите, вклучително и проверки на брзината, возачките дозволи, носењето заштитни кациги и почитувањето на останатите сообраќајни правила.

Засега нема информација дали мотоциклистот од снимката е идентификуван, кога точно е направено видеото и дали надлежните институции презеле мерки за утврдување на евентуални прекршоци.

Снимката повторно го отвора прашањето колку се почитуваат сообраќајните правила на булеварот на кој веќе се случија трагедии со смртни последици, но и дали системот „Безбеден град“ и полициските контроли ќе обезбедат навремено откривање и санкционирање на ваквото однесување.