Вкупно 3.100 граѓани досега побарале медицинска помош по епидемијата со гастроентеритис во Гостивар, соопшти министерот за здравство Сашо Клековски, посочувајќи дека за првпат е забележано намалување на бројот на нови здравствени контакти. Клиничката слика се стомачни проблеми, а поретко со температура и треска.
Тој објасни дека бројката не се однесува само на пациентите прегледани во Општата болница „Ферид Мурад“, туку претставува интегрирани податоци од сите здравствени установи во градот.
„Во моментот досега има околу 3.100 здравствени контакти. Тоа ги опфаќа контактите во Здравствениот дом и во Општата болница во Гостивар, вклучително и телефонските јавувања, интервенциите на Итната медицинска помош и прегледите во двете установи. Бројките што беа соопштувани во текот на викендот се однесуваа само на Општата болница и не ги содржеа податоците од Здравствениот дом“, изјави Клековски.
Според него, во текот на вчерашниот ден биле евидентирани 564 здравствени контакти, од кои 289 во Општата болница и 275 во Здравствениот дом.
Тој ги презентираше и дневните бројки од почетокот на епидемијата. На 14 јули биле регистрирани 324 здравствени контакти, на 15 јули – 456, на 16 јули – 531, на 17 јули – 572, на 18 јули – 649, додека на 19 јули бројката се намалила на 564.
„Денешните податоци покажуваат дека 19 јули е првиот ден кога имаме намалување на бројот на први здравствени контакти“, рече Клековски.
Тој информираше дека Итната медицинска помош досега интервенирала во 112 случаи поврзани со епидемијата.
Во моментов во болниците се хоспитализирани четири пациенти – тројца возрасни и едно дете, а уште еден пациент е сместен на Клиниката за инфективни болести во Скопје, каде што сам се јавил бидејќи работи во главниот град.
Клековски соопшти и дека досега се регистрирани 140 формални пријави за заразна болест, додека епидемиолошките служби спровеле 81 анкета во рамки на истрагата за утврдување на причините за епидемијата.
