Во Белград вчера се одржа протестен собир за поддршка на сатиричарот Зоран Кесиќ и екипата на емисијата „24 минути“, откако новите сопственици на телевизијата Нова С ја укинаа емисијата по 13 години емитување.
На собирот се собраа неколку илјади граѓани, новинари и актери, меѓу кои беше и самиот Кесиќ. Присутните во протестна поворка поминаа покрај зградите на Народното собрание и Претседателството на Србија, испраќајќи порака против, како што беше истакнато, сè поголемите притисоци врз независното новинарство.
Собирот го организираа Независното здружение на новинари на Србија, Здружението на новинари на Србија, Фондацијата „Славко Ќурувија“, Асоцијацијата на независни електронски медиуми и Независното друштво на новинари на Војводина. На повикот се приклучија и новинари од Н1, Нова.рс, „Форбс Србија“, „Данас“ и „Радар“.
Од организаторите порачаа дека не станува збор само за една емисија, туку за одбрана на просторот за критика, слободата на говорот и правото на јавноста да ја следи работата на власта од различни перспективи.
Кесиќ, обраќајќи се за РТЛ од Белград, ситуацијата ја опиша како целосно „шизофрена“ и „безумна“. Тој рече дека мисијата на неговата емисија била да укажува на жртвите на режимот, а сега се случило луѓето да сакаат да им помогнат ним.
За укинувањето на емисијата, Кесиќ призна дека се чувствувал ужасно и дека сметал оти им била нанесена голема неправда.
„Бев тажен и лут. Сакав да се одмаздам и сè уште сакам да се одмаздам, сакам да се борам“, рече Кесиќ.
Тој најави дека „24 минути“ продолжува со нова сезона на Јутјуб од 19 септември. Емисијата ќе се емитува на каналот кој има повеќе од 600.000 следбеници.
„Тоа ќе биде нашиот медиум, нашата телевизија. Ако тоа е нашето единствено засолниште, ќе ги повикаме сите следбеници да ни помогнат да опстане ова наше, кое е и нивно“, порача Кесиќ.
Првиот на собирот се обрати актерот Милош Војновиќ, кој оцени дека случајот со Кесиќ е уште еден знак на, како што рече, авторитарна власт, која се обидува да ја замолчи критиката.
Претседателот на НУНС, Жељко Бодрожиќ, порача дека без оглед на сопственикот на медиумот, постојат закони, уредувачка автономија и професионални правила кои мора да се почитуваат.
„Ние сме новинари и се повикуваме на законите на оваа земја“, рече Бодрожиќ, додавајќи дека во интерес на јавноста е граѓаните да добиваат навремени и точни информации, а не пропаганда и лаги.
Претседателката на Извршниот одбор на Здружението на новинари на Србија, Оливера Ковачевиќ, порача дека Србија има потреба од Кесиќ и од новинари кои не се откажуваат од професијата.
„Општество кое воспитува послушни пропагандисти наместо новинари нема иднина“, рече Ковачевиќ, додавајќи дека неговата сатира и смеа се „опасни“ затоа што ги ослободуваат луѓето од страв.
Актерката Цеца Бојковиќ оцени дека на власта очигледно ѝ пречи дури и „24 минути“. Таа рече дека не верува оти со укинувањето на емисијата може да се задушат слободниот говор и отпорот на сè поголем број граѓани.
Причината за укинувањето на емисијата, според новите сопственици на телевизијата, е високата цена на продукцијата и нејзиниот мал комерцијален ефект. Од компанијата „Адрија њуз нетворк“, сопственик на Нова С, велат дека емисијата била една од најскапите програмски ставки, со годишен трошок од повеќе од половина милион евра за помалку од 30 часа програма.
Кесиќ, пак, смета дека причините се политички, а не деловни. Тој посочи дека емисијата била една од најгласните критики кон власта и праша дали е случајност што е укината два месеца пред изборите.
„Ќе останеме фини и опасни. Изгледа дека сум еден од најопасните луѓе во нашата земја, заедно со мојата екипа, и тоа некако ми годи“, рече Кесиќ.
Тој порача дека укинувањето на емисијата не го доживува како крај, туку како причина за продолжување на борбата преку новата платформа.
