Необичен песочен вртлог, познат како „dust devil“, пред неколку дена се појавил во околината на словенечкиот град Кршко и ги изненадил посетителите на локалните тениски терени.
Иако феноменот траел кратко, бил доволно силен за да покаже дека ваквите природни појави не се секогаш безопасни.
Песочниот вртлог настанува над силно загреана подлога, кога врелиот воздух брзо се издигнува. Поради промени во струењето на воздухот, тој почнува да ротира и создава вртлог што подига прашина, песок, лисја и други лесни честички, што го прави лесно видлив.
Овој феномен најчесто се јавува во сончеви, многу топли и суви денови, кога атмосферата е релативно мирна.
Повеќето песочни вртлози се со слаб интензитет и не предизвикуваат штета. Сепак, посилните можат да достигнат брзина на ветерот поголема од 80 километри на час, при што можат да превртат полесни предмети, да оштетат покриви, да соборат дрвја и да предизвикаат помала материјална штета.
