Њујоршката полиција започна истрага по серија необични инциденти во кои групи луѓе биле забележани како влегуваат и излегуваат од градскиот канализациски систем.
Според американските медиуми, надзорни камери во делови од Бруклин и Квинс снимиле неколку мажи како отвораат шахти, се спуштаат во подземните канали и повторно се појавуваат по неколку часа.
Засега не е утврдено дали станува збор за иста група што стои зад сите случаи. Од њујоршката полиција соопштија дека минатата недела биле примени повеќе пријави за лица кои ги отстранувале капаците на шахтите и влегувале во канализациската мрежа.
Од градското Одделение за заштита на животната средина предупредуваат дека ваквото однесување е незаконско и исклучително опасно.
„Канализацискиот систем крие бројни ризици, меѓу кои штетни и потенцијално смртоносни гасови, нестабилни површини, опасност од поплави и движење во тесни простори“, изјавиле од одделението.
Полицијата наведе дека осомничените по влегувањето во системот заминувале со засега непознато возило, а во досегашните инциденти нема пријавени повредени лица.
Според полициски извори цитирани од американските медиуми, можно е да станува збор за таканаречени „ловци на богатство“ и урбани истражувачи кои во канализацијата бараат предмети со потенцијална вредност.
Доколку бидат идентификувани и приведени, тие би можеле да се соочат со обвиненија за нелегално навлегување и други прекршоци.
